Svarfdælasýsl forlag sf. er með þrjár bækur á bókamarkaðinum í Laugardal (undir áhorfendastúkunni við fótboltavöllinn) frá 28. febrúar til 17. mars 2024. Allt áhugavert lesefni á tombóluprísum.
Lífshlaup athafnamanns – útgefin í ágúst 2020.
Saga Péturs Péturssonar sem sat á Alþingi fyrir Alþýðuflokkinn á öldinni sem leið og kom líka víða við sögu í athafnalífi landsmanna og samningum um viðskipti Íslendinga við stjórnvöld ríkja í Austur-Evrópu. Hann starfaði í Landssmiðjunni, var forstjóri Innkaupastofnunar ríkisins, framkvæmdastjóri Kísiliðjunnar, Álafoss og Norðurstjörnunnar, starfsmannastjóri við Sigölduvirkjun og liðtækur í að reisa við fyrirtæki sem illa stóðu rekstrarlega.
Magnús Pétursson skráði og tileinkar bókina Pétri Óla, bróður sínum. Þeir ólust upp á Vindheimum í Skagafirði eftir skilnað foreldra sinna. Magnús er þjóðkunnur fyrir störf sín. Hann var ráðuneytisstjóri í fjármálaráðuneytinu, síðar forstjóri Landspítala og loks ríkissáttasemjari.
Á árinu 2023 kom út Ferðabók Feita-Jarps 1993-2018 sem Magnús skráði og gaf út ásamt Jóni Bjarnasyni. Feiti-Jarpur var ferðahópur nokkurra hestamanna sem fóru um landið sumar eftir sumar sér til fróðleiks, ánægju, skemmtunar og upplifunar.
Beckmann – útgefin í september 2020.
Saga tréskurðarmeistarans og jafnaðarmannsins Wilhelms Ernst Beckmanns sem kom til Íslands sem flóttamaður frá Þýskalandi vorið 1935 eftir að nasistar bönnuðu Jafnaðarmannaflokk Þýskalands. Werner Gerlach, aðalræðismaður Hitlers-stjórnarinnar á Íslandi tróð illsakir við Beckmann og kvaddi þennan landa sinn til skráningar á ræðismannskontórnum. Beckmann gaf skít í Beckmann og lét ekkert færi ónotað til að opinbera andstyggð sína og fyrirlitningu á ræðismanninum og nótum hans. Bretar létu verða sitt fyrsta verk að handtaka Gerlach á hernámsdaginn 10. maí 1940 og flytja í tugthús í Englandi.
Atli Rúnar Halldórsson var ritstjóri og umsjónarmaður útgáfunnar í samstarfi við Stofnun Wilhelms Beckmanns.
Eftir Beckmann liggja listilega gerðir skírnarfontar, altaristöflur og fleiri munir í að minnsta kosti 12 kirkjum á íslandi. Hann skar líka út margvíslega nytjahluti, málaði og teiknaði og hannaði meðal annars merki Hótels Borgar í Reykjavík árið 1946, merki sem hótelið notar enn þann dag í dag (en eigendur þess höfðu enga hugmynd um hönnuð merkisins fyrr en bókin kom út!).
Heimildamynd um Beckmann, Hér er mitt Frón, var sýnd í RÚV í tvígang í febrúar 2024. Kveikjan að henni og hryggjarstykkið í frumhandriti hennar var bókin um Beckmann. Hvorki var bókarinnar getið né útgefandans, Svarfdælasýsls forlags, og ritstjóra/umsjónarmanns útgáfunnar sem lagði samt kvikmyndagerðarmönnum lið.
Hittumst á Horninu – útgefin í október 2021.
Saga veitingastaðarins Hornsins í Reykjavík og fjölskyldunnar sem hefur átt hann og rekið frá upphafi, sumarið 1979. Atli Rúnar Halldórsson skráði.
Hornið var fyrsta pizzerían á Íslandi, matar- og menningarhús í einu af elstu húsum gamla miðbæjarins í höfuðborginni. Jakob H. Magnússon og Valgerður Jóhannsdóttir hafa staðið vaktina og fastagestir skipta þúsundum.
Saga Hornsins er mikilvægur þáttur í sögu veitingareksturs á Íslandi og um leið hluti af byggða- og atvinnusögu Reykjavíkur.
Svarfdælasýsl forlag sf 